نادية البسيونى تكتب : شلال حنين
قولها كمان
ارمح بصوتك فى الصحارى والجبال
قول هللى واسترسلى
يا ماية نازلة من أعالى منزلى
فجر على شط القمر شلال حنين
يجعل بقلبى محبتك تشفى العليل
يجعلها سارى لخطوتك طول الطريق
يجعلها موجة تمد إيدها للغريق
يجعلها حفنة من التراب معجونة بيك
يا نبع أحلام الربيع
قلبى سبيل الصابرين الحامدين
ونجوم تنور فى الخلا الليل الضرير
وبيوت تغطيها السما بشالها الحرير
مكتوب عليها بخط مصرى من سنين
النيل على بابنا الكبير
حارس أمين
غاوى غناوى الطيبين
يجرى بشوق المحسنين
يسقى العطاشى سلسبيل
ابن النخيل اللى حنى لعابر سبيل
ابن النسيم اللى مسح دمعة حزين
ابن انسجام الليل على اكتاف الهديل
ابن الطريق المستجير بين دعوتين
من عند باب السيدة وباب الحسين
قال يا كريم
سلِّمها من مكر الأعادى ومن قساوة أى عين
