شاعر العامية ناصر دويدار : اختارت أكون إنسان
الناس بتطلع من ثنايا بعض شعره من عجين
الناس جميعاً بيدخلوا أحياء لبعض
وبيطلعوا من ورا بعض ميتين
أنا مازلت أتألم وأعانى
وأكابدوسط بنى أدميين
أخترت أكون أنسان
مايهمنيش أختاروا يبقوا مين
الحزن بيعلم طريقة المشي
والكلام…
والأمل
وعلاقة الأشجار بنضارة المحبين
الناس بتطلع من إيدين البعض
أموات عايشين
طول عمرى بتأمل علاقه التكوين
ميلاد
حب
كراهيه
سفر
دين
طول عمرى بتأمل وبتألم إزاى
بنبتدى عشاق وننتهى كارهين؟
أختارت أكون إنسان
محبتي …..دين
عشقت روح
والملامح مش تمللي بتطل بوضوح
فى حاجات كتير بتروح
وتفضل ريحة السيره
بوسه الشروق علي الجدران
حضن الحنان
تكتيفة الدراعين
الأمان
عرق الإيشارب
طول الضفيره
والسلاح ف الحرب
مش بالضرورة مدافع
رصاص
طيارات
خطط خطيره
السلاح في الحرب
بنت….ف قلبها
نقطه عسل…ولقمة فطيره
القوة مش مين يشد التانى
يهزم التانى
يكسر التانى
القوة…أتنين يقدروا
يملوا الحياه …..أغانى
الناس بتطلع من ثنايا بعض
وإنتى طلعتى من ضلوعى
طالعه ربانى
ولاده بالنزيف
والالم…
وحبل سرى كل ماينقطع
يتوصل تانى
صوت الكمنجة بيولد يمام
رئتى بتتنطط
حزن علي فرح
علي الكلام
حنجرتى مجرى طويل للغرام
بتتألم عروقي من دنيا حراقه
يطلع غنايا…..سلام
صوت الكمنجه
قطتين ممددين ع البلاط
الحب مش محتاج لسجاده
الحب بيخلق من دوله الإحباط
أوطان سعاده
حبينى
صبي شفشق الكمنجه علي روحى
حفضل أحبك وبزياده
أختارت أكون إنسان…
يا أنتصر علي فُجر الانسانيه
ياإما الشهاده
شعر : شاعر العامية.. ناصر دويدار
