هاله العكرمي تكتب : آه يابلد

صباح الرضا والنور
يا مصر على أرضك
على كل شعبك وناسك
وكل من حبك

صباحك وفا ومودة
رحمة وحنية
يا أمي يا مأثرة
في كل شيء فية
ألا صحيح ممكن
تقسى على وِلدك؟

طب تقسى انتي ازاي
وهوا بيودك !

والطمعانين فيكي
ازاي تطاوعيهم؟
دول يخنقوا ولادك
تبقى السند ليهم؟
دول اللي سفكوا دما
ولادك على أرضك
واللي بيعشق ترابك
و بيشتري ودك
وبروحه يفديكي
ما يلقى غير صدك

آه يا بلد
منك،وألفين آه
عاوزة قلوب من حديد
تتحمل القسوة
فين حرمتك يا شهيد
طيب ،،، وفين حقٓك
واللي اتملي قلبها
حرقة ،،، عليك
،،، أمك
دي مين يجيب حقها
كيف تنطفي نارها
يا مين يجيب تارك
يا مين يجيب تارها
امتى يئون الأوان
ويهل يوم عيدك
يملا الفرح دارها

يا مصر ألا انتي ممكن
صحيح تنسى
سالي وكريم ومحمد
اسلام وسيف والمنسي؟

قلبي يقولي لأ
مصر العظيمة
بتنجب ساعة المخاض أبطال
ومصر طول الزمان
حرة بأحرارها

Yoast