شريف إدريس يعلن اعتزاله الفن: مديون لطوب الأرض ومش عارف أعيش

هبة أمين

أعلن الفنان شريف إدريس، اعتزال الفن، لعدم قدرته على التواجد بشكل يرضيه في الأعمال الفنية، وعدم حصوله على فرصة حقيقية لإثبات نفسه.

وكتب عبر حسابه بموقع التواصل الاجتماعي فيس بوك قائلا: بعد 35 سنة سعي وتعب وشقى في الوسط الفني قررت الاعتزال والابتعاد تماما وتغيير مسار حياتي.

وأضاف قائلا: وأي حد عنده فرصة سفر ليا هاكون شاكر ليه وده طلبي الوحيد ، وده قرار أخدته بعد ما الأمور وصلت في الوسط الفني لمرحلة عبثية، وصلت إني بقيت بشوف بعض الزملاء بيشحتو الشغل علني علشان يشتغلو لأن الشغل بقي متقسم على ناس معينة فلو الأمور وصلت لكده أبعد احسن.

وتابع: وحتي لما بيجي شغل بيتفرض عليك توافق بأقل الفلوس وتخرج من الشغل مديون،و مواقف مهينة زي إن شركة انتاج تعرض عليك أجر هو قيمة ربع أجرك والسبب إنهم الميزانيه مصروفه على الديكور، طب خلو الديكور يمثل.

قال ساحكي موقف حصل معي من أسبوع، اتصل بي حد قالي عايزين حضرتك بكره عندك تصوير في مسلسل كذا بس هتدفع عشره في الميه للكاستينج دايريكتور، كان هيجيلي جلطه بعد ماقفلت المكالمه ووافقت علشان انا محتاج اشتغل ومحتاج فلوس.

وأضاف شريف إدريس بقوله: ماقدرتش استوعب الفكرة بصراحة أني بعد العمر ده مضطر أدفع علشان اشتغل فاتصلت واعتذرت وده الحال حاليا إن الأمور بقت في ايد كاستينج دايريكتور وده موقف من مواقف كتيرة مررت بها لو حكيتها محتاجه كتاب وليس بوست علي الفيس.

واستكمل قائلا: طالما الشغل بقي لابد يتدفعله وطالما الشغل بقي بالشحاتة يبقي بلاش أحسن
أنا طول عمري راضي الحمد لله، بس حقيقي أنا وصلت لمرحلة اكتئاب وصلتني إني بقيت بنام أحلم بكابوس إني بقتل عيالي وبقتل نفسي لأني وصلت لمرحلة نفسية ومادية إني بقيت مش قادر أربيهم ولا أصرف عليهم وأنا عندي ثلات أطفال بعبدهم عبادة متخيلين حجم المسؤولية وبقيت مديون لطوب الأرض.

واختتم كلامه قائلاً: حقيقي لو حد عنده فرصة سفر لي ساكون شاكر ليه جداً وهيكون جميل في رقبتي لحد ما أموت لأن حقيقي أنا مش قادر أعيش في البلد دي تاني أنا حاولت أسعي في أي مجال تاني بس ماقدرتش.

وتابع: حقيقي لو اتعرض عليا بطولات بعد البوست ده هرفضها لأن ده نهاية علاقتي بالمجال اللي اتربيت فيه ودرسته وعشت فيه كل تفاصيل حياتي والحمد لله على كل شئ، همسح ابلكيشن فيسبوك من تليفوني لأني هنزل أبيع تليفوني أصلا، فأنا هاكون متاح أونلاين لحد بالليل، لو حد عنده فرصة شغل وسفر لي ومش معاه رقمي ياريت يجيبه من أي حد، أنا مش محتاج طبطبة من حد أنا محتاج فرصة سفر وشغل تخليني أعيش ولادي حياة كريمة وبس، هاين عليا أقوم ارمي نفسي من البلكونة.