محمد مدني يكتب :الأم حنّية لا تموت
فقدان الام وجع لا يشبهه وجع اخر لانه وجع بيحصل مره واحده بس وبيكمل معاك العمر كله لما الام تمشي بتحس ان البيت اتسحب منه الدفا وان الايام بقت تقيله وانك بقيت لوحدك حتي لو حواليك ناس كتير صوتها اللي كان بيطمنك سكت وايدها اللي كانت بتطبطب اختفت والدعوه اللي كانت بتطلع من قلبها قبل ما تنام بقت ذكرى بتوجعك كل ليله.
فقدان الام مش لحظه عزاء وخلصت دي حاله بتعيشها كل يوم في تفاصيل صغيره في الاكل اللي مابقاش ليه طعم وفي العيد اللي بقي فاضي وفي الشارع اللي كنت بتمشي فيه وانت مطمن عشان عارف انها مستنياك في البيت.
الام مش مجرد شخص بيربي ويكبر الام هي الوطن الصغير اللي لو ضاع تحس انك لاجئ في الدنيا ومهما كبرت ومهما بقيت قوي هتفضل جواك طفل بيدور علي حضنها وعلي كلمه معلش اللي كانت بتشيل عنك الدنيا كلها.
الكلام عن الام اللي راحت مش بيخلص لان الوجع اللي سابته اكبر من اي كلام واكبر من اي دموع وكل اللي فاضل انك تدعيلها وتفتكرها وتقول لنفسك هي كانت هنا وخلت.
فيك حاجه عمرها ما هتموت وبتفضل تحن لريحة هدومها ولصوتها وهي بتنادي عليك بالليل عشان تتاكد انك نايم مرتاح وبتفضل تسال نفسك ليه كل حاجه حلوه في الدنيا ليها عمر قصير، وليه الحضن اللي كان بيطمنك اتشال منك فجاءه.
بتحس انك اترميت في دنيا واسعه من غير دليل ومن غير حد يقولك انت صح ولا غلط وبتتعلم تكمل غصب عنك عشان هي علمتك تبقي قوي حتي لو قلبك متكسر من جواك وبتبدا تفهم ان الام عمرها ما بتموت.
بجد طول ما انت فاكرها وبتحكي عنها وبتعمل الحاجات اللي كانت بتحبها عشان تحس انها لسه معاك في كل خطوه بتخطيها، رحم الله امهاتنا وادخلهم الفردوس الأعلى، فلمسة الأم حنية لاتموت.
محمد مدني يكتب :الأم حنّية لا تموت
