مني جلال تكتب : يوم مولدك
عاشقاك يا سيدنا النبي
مشتاقة لرحابك
وهاعيش واموت مطلبي
واقفة على بابك
طمعانة إني أكون
من ضمن أحبابك
وأنول شفاعة ورضا
كما نالوا أصحابك
يوم مولدك يا نبي
كان رحمة للعالمين
يشهد كمان الصبي
إنك رسول وآمين
صلى عليك ربنا
وملايكة ع الصفين
والشمس ويا القمر
هما كمان شاهدين
لمسة إيديك يا نبي
فوق الحديد بيلين
جالك غزال اشتكى
شايل هموم وحزين
والجزع لما بكى
كاتم آهات وآنين
يا حبيبي وبرحمتك
كانوا أكيد راضيين
يا شفيعي نظرة رضا
في الآخرة يوم الدين .
عاجز كلامي أكيد
محتارة أوصف فيك
وانا مهما اقول .. ولا قول
يا حبيبي هيكفيك
مشتاقة أشرب أنا
الميه من كفيك
يحلى الكلام لو دام
في لساني يحكي عليك
يوم مولدك يا نبي
للعالمين يوم عيد
والكون بحاله ظهر
بلون وشكل جديد
حتى الطيور ع الشجر
غنوا كمان أناشيد
والرمل ويا الحجر
صلوا وسموا أكيد .
باينة الحياة مؤلمة
وكئيبة ومعتمة
وحزينة بغيابك
بأمي أنت وأبي
ومن الحياه مكسبي
وهاعيش واموت مطلبي
واقفة على بابك .
