في سبيل بهية..نبضات بالعامية تكتبها : كارمن رحال
ابني كل يوم يبعت دليل علي حبه ليه ماينتهيش.. مرسال خطير حروف حروف من غير عدد…!
كلام كتير فاق الوجع…!
يحكي وهو بيبتسم وانا بندبح ويقولي بالمبتدأ
أن غبت يامة ماتزعليش..!
لو طال غيابي ماتفزعيش!’
رديت وقلت…..!
ابني يقولي ان غبت يامه ماتزعليش…! وإن طال غيابي ماتفزعيش ..!
داأنت السند وانت الونس وانت النهار بسكتي وانت الأمان في غربتي وانت الأمل علشان أعيش وازاي تقولها بالبساطة ماتخافيش…!
اسمعني يابني كلمه مني حسها ويارت تجيني بعدها وتقولي يامه ماتزعليش..!
عارف ياضي العمر اني غيرك مااشتهيش..؟!
وانا والوجع صرنا حكايه تنحكي من وقت اول صرخه ليك علشان تعيش..!؟
اسمعها مني وادي وش ضيف
عارف يعني ايه وجع
علشان تقولي ما تزعليش!؟
يعني… قلب بيتمزع
يعني أم شافت ضناها
من بين حشاها بينتزع
يعني مسامير بتدق
بين كفوفك ياجدع
يعني حق بينسرق
ويقولوا علي السارق
جدع…!
يعني ريح عتيه
تاخد بسكتها
آخر حضن ليه
يعني دمعتي ليله عشيه
وقت يجي العيد عليه
والقلوب مبقتش هيه
الحيطان متشققه
والعيال متفرقه
كل عيل تاه في سكه
ويقولولي بكره عيد
عيد سعيد
مادرتوش..!
ماهو مات سعيد
واندبح.!.
بعد ماقال ياحريه
انقذوا عرض البنيه
قتلته كلمه شهامه
قالوا ياما
سكته سكه ندامه
هو اللي اختار يكون
ابو زيد الهلالي
بزمن ملعون ابوه
بيرخص الغالي
وارجع واقول
يعني ايه وجع
يعني صبار انزرع
جوه قلبك ياجدع
كل يوم ينبت الف آه
جوه وجداني
وارجع واقول تاني
فينك ياحريه
عاشقك يانبع حنان
ياست الكل يابهيه
وانا مهما لاموني
وبالنار حوطوني
ماتنازل بيوم عنك
ياأم الكفوف محنيه
هتفضلي رغم الوجع
عايقه وصبيه
ياأم النخيل عالي
ولونه من لون عيونك
العسليه
اوعاكي تبكي عليه
خلودي بترابك
علي بابك الف صوت
راح ينولد
ويغني اغنيه
عشقك ياسمرا يأم الكحلة
ياصبية
اناغنوتي.. غنوة الموجوع
سواقية…. للأرض الشراقي
نوارها حرية..
عابر سبيل ..مابين الشط والميه
عابر.. لكن راجع… بيوم ليه
عابر ..لكن بتغني جوايه ومعايه
حكاويه …غناويه
اوعاك تغيب… اوعاك تقول.. ان غبت يامه ماتزعليش.. انا مااتنسيش..! وانت الأمل علشان اعيش لو غبت غابت قصتي… صبحت مفيش ..!
yoast
