نادية البسيوني تكتب: لله في الله
لله ف لله قلبى يحبك
معرفش ازاى
حاسة انك واحد من عيلتى
يمكن خالى ويمكن عمى ويمكن….
يمكن عمرى التايه منى
وافرح جدا
لما القاهم جايبين سيرتك
لما يقولوا ف قعدة شاى
إزاى قلبك زى الناى
رغم الحزن اللى مغطيه
قادر يمسح دمع الناس
ازاى بتصبر أوجاعك
وترصصها فوق أوجاعك
من غير ما تحسسها بزن وشكوى صداعك
ازاى شايل فوق أكتافك حمل الأرض
وعنيك دايما مأوى الخلق
ازاى قادر تقطف نجمة
رغم الليل القاسى الصعب
وازاى بتطمن أحلامك
وتعديها بفركة كعب
واما بتقعد تحكى حكايتك
كل الصحبة بشوق تتجمع جوة مرايتك
تشهد أجمل قصة حب
واما ترد الكلمة بقافية
الأيام بتموت م الضحك
يا دى السحر
قلبك شمس ومرسى وبحر
ازاى سيرته الحلوة الدافية
دايما بتقربنا لبعض
زى عيون الدنيا الساقية
لما تلف وتطوى البعد
